കൊച്ചി: മുനമ്പം ഭൂസമരത്തിന് ഇന്ന് സമാപനം. റവന്യു മന്ത്രി കെ രാജന്‍, നിയമമന്ത്രി പി രാജീവ് എന്നിവര്‍ ഉച്ചയ്ക്ക് രണ്ടരയ്ക്ക് നടക്കുന്ന സമാപനയോഗത്തില്‍ പങ്കെടുക്കും. സമരം ആരംഭിച്ച് 414-ാം ദിനമാണ് അവസാനിപ്പിക്കുന്നത്. ഹൈക്കോടതി ഉത്തരവിന് പിന്നാലെ നികുതി സ്വീകരിച്ചുതുടങ്ങിയതും പോക്കുവരവിനുളള സംസ്ഥാന സര്‍ക്കാര്‍ സഹായവാഗ്ദാനവും പരിഗണിച്ചാണ് സമരം അവസാനിപ്പിക്കുന്നത്. ലത്തീന്‍ സഭാ നേതൃത്വത്തിന്റെ അനുമതിയോടെയാണ് സമരം അവസാനിപ്പിക്കുന്നത്. ഭൂമിയുടെ സമ്പൂര്‍ണ ക്രയവിക്രയ അവകാശം ലഭിക്കുന്നതിനായുളള നിയമ പോരാട്ടങ്ങള്‍ തുടരുമെന്ന് സമരസമിതി വ്യക്തമാക്കി. മുനമ്പത്തേത് വഖഫ് ഭൂമിയല്ലെന്ന് ഹൈക്കോടതി ഡിവിഷന്‍ ബെഞ്ച് നിരീക്ഷിച്ചിരുന്നു.
അതേസമയം, സമരം അവസാനിപ്പിക്കുന്നതില്‍ ഭിന്നതയും ശക്തമാണ്. ബദല്‍ സമരം ആരംഭിക്കുമെന്ന് മുനമ്പത്തെ ബിജെപി അനുകൂലികള്‍ വ്യക്തമാക്കി. സമരസമിതി മുനമ്പം ജനതയെ വഞ്ചിക്കുകയാണ് എന്നാണ് ഇവരുടെ ആരോപണം. തെരഞ്ഞെടുപ്പ് സമയത്ത് സമരം അവസാനിപ്പിക്കുന്നതില്‍ രാഷ്ട്രീയ ലക്ഷ്യങ്ങളുണ്ടെന്നും അത് അംഗീകരിക്കില്ലെന്നും ഇന്ന് മുതല്‍ ബദല്‍ സമരം ആരംഭിക്കുമെന്നും ബിജെപി അനുകൂലികള്‍ വ്യക്തമാക്കി. മുനമ്പം ജനതയെ കുടിയിറക്കില്ലെന്ന മുഖ്യമന്ത്രിയുടെ ഉറപ്പ് പാലിക്കപ്പെട്ടെന്ന് മന്ത്രി പി രാജീവ് കഴിഞ്ഞ ദിവസം അവകാശപ്പെട്ടിരുന്നു.
Content Highlights: Munambam land dispute protest to conclude today